A Gschichd von de drei tapfere Schwoba, dia end Weld nauszoga send
So Leidla, do isch dui Gschichd von dene drei tapfere Schwoba, dia nauszoga send, um d Weld kenna zom lerna. Es handelt sich dabei om dr Done, dr Triabl ond dr Sell. Dia drei läbad do auf dr Schwäbischa Alb, em a kloina Flegga, der mai Kiah wia Leid hot. Do sand se recht zfrida mit ällam, au wenn se hin ond wiader dengad, dass se scho gära mol mai von dr  Weld sea dädad, als des, was se bisher kennat. Wobei dr Sell dr große Held isch, weil der s scho a mol bis Heilbronn gschaffd hod. Weiter nördlich war no koiner von dene tapfere Älbler.
Dr Sell hot des gar ed so schlecht gfonda, do en Heilbronn, au wenn r scho noch zwoi Dag Hoimwaih khet hot ond deshalb dr Aufenthalt do abrocha hot.
Dr Triabl ond dr Done hand en d Lecher en Bauch gfrogt ond gar ed gnuag kriaga kenna von dem seine Schilderunga. Jo, eines Tages wolldad se mol zu dritt weit en d Norda reisa. Jedes Johr hand se dovo gschwätzt, bis dr Done eines Tages Negel mit Kepf gmacht hot. D Bomb hot er beim Beeramoschd trenga blatza lassa.
"I hau ons a Hotelzemmer buacht", hot er gsait, "ond zwar in Keln."
Dam Triabl ond am Sell send Kinnlada noch onda gfalla. "Wa hosch du?", hand sen wia aus einem Munde gfrogt.
"I hau ons a Zemmer in Keln buachd, hau i gsait."
Die andere zwoi hand echt bled aus dr Wäsch guggt. A ganzes Weila hand se nix mehr saga kenna. So hand dia drei en aller Stille a baar Kriag Moschd gsoffa, bis dr Sell endlich d Mund wiader aufkriagt hot. "Des isch jo abbas!", hot r gruafa, dann isch am schlechd worra ond r isch aufs Klo grannt.
***
Zwelf Wocha schbäter sand se dann gfahra, grad rechtzeitig zom Kelner Karneval. Den hand se aus am Fernseha kennt. Klar hots au auf dr Schwäbischa Alb Faschingsumzig gäba, aber dane send se emmer fern bliaba, weil dia denne ed en der Kram basst hand. Des Verkleida isch ed denne ihr Sach gwea.
Jetzt hand se sich aber verkleida miassa, denn, des hand se scho gwissd, overkleidat got ma ed auf der Kelner Karneval. Jetzt, als wa got ma do abr na? Des isch dia großa Frog gwea, iber dia se sich wochalang dr Grent zerbrocha khet hand.
Abr dann isch am Triabel abbas eigfalla. Der hot no emmer d beschde Idea khet, grad wenns oms Modische ganga isch odr oms Kreative. Voller Stolz isch r eines Tages zu de andere komma ond hot gsait: "Leit, i hans! D beschda Verkleidung, dia dene Kelner sicherlich subber guat gfalla wird." Mit dane Worte hot er sei Vorlag auf dr Tisch glegt.
"Mir sollat os als Bier verkleida?", hot no dr Done oglaibig gfrogt.
"Ha jo! Mensch, dia do oba drengat doch au gera Bier. Ond dia hand des ganz Bsondere."
"Echt? Des isch jo subber genial!", hot dr Sell globt.
"Des isch no net ällas", hot dr Triabel verkindat.
"Ed?", hand seine zwoi Kumpel erstaunt nochgfrogt.
"Noi, no lang ed! Guggat au, i han no en Spruch dichtat, mit dem mr onsra Verkleidung sozusaga perfekt machat."
"Jo? Dann lass mol hera!", hot dr Done gfordrat.
Dr Triabel hot sich en Position gschdellt ond dann losglegt: "Mir drei Flascha Alt lassat eich Kelner ed kalt."
Zerschd hand die andere boide applaudiert, dann isch am Sell was eigfalla: "Sag a mol, moisch, dia vrschandat ous, wenn mr so broit Schwäbisch schwätzad?"
Dr Triabel hot doriaber nochdacht ond dann gsait: "Se kennat ons jo froga, wenn se wissa wellat, was mr gsait häbat." Domit warat älle zfrieda.
Jetzt sitzat se em Zug noch Keln, voller Vorfreid, wobei se mit ihre riesige Verkleidungssäck fir n aschtändiga Stau em Waggon sorgat. Dia beise Blick nammat se ed wohr, genauso wenig wia die beißende Kommentare einiger Mitreisender. Selbscht als en Mannheim a baar Badener zuagschdiega sand ond des ed lassa hand kenna, blede Sprich abzomlassa, hand se ed reagiert. Daraufhin hand des dia andere eigschdellt ond sich domit zufrieda gäba, dene drei dr Vogel zom zoiga.
Dr Done, dr Sell ond dr Triabel warat en ihrer oigana Weld, dui daraus beschdanda hot, dass se sich auf Keln gfreit hand wia d Schnaikenig. Do hand se au no ed gwisst, was se erwartet. Aber dozua a ander Mol.
Bis demnächschd, em nächschda Kapitel.
Eier
Peter Albra Brenner (c) 2016

Doil 2 von dera Gschicht

S hot a Weile daurat, abr no send se en Keln akomma. Do war vielleicht en Truabel do auf am Kelner Hauptbahhof! Do isch denne faschd schwendlig worra.

"Mo miassat mr jetzt na?", hot dr Triabl gfrogt.

"Lass me au gugga." Dr Done hot sein Zettel aus dr Hosadasch kramt. Des hot braucht, abr er hot en gfonda. "Des isch gar ed so weit weg vom Bahhof", hot er vrkindigt. "I glaub, mir kennat ons a Taxi leischda."

Se send also durchd Bahhofhalle glaufa, wobei se mit ihre ausladende Gepäckstick dr oine ond au d andara gherig gnervt hand. Ama Gitarraschpieler hand se glatt dr Auftritt a bissle vermasselt, weil se em faschd d´s Inschrumend aus dr Hand gschlaga hand. Der isch vielleicht beiß worra ond hot denne a baar recht oflätige Ausdrick henterher gschickt. Aber des hand dia gar ed so richtig mitkriagd.

Draussa sand se dann zum nächschdbeschda Taxi ganga ond hand ans Fenschder gloppft, woraufhin der Fahrer des ronder fahra hot lassa.

"Kennat Sie ons zom Hotel Paradies brenga?", hot dr Done gfrogt, denn der hot des Hotel schliaßlich besorgt.

Der Taxifahrer hot se a bissle bled aguggt. "Wat wollt ihr?", hot er gfrogt.

Der Sell hot sei beschdas Hochdeitsch rauskramt ond wiederholt: "Können Sie uns zum Hotel Paradies bringen?"

Der Fahrer hot emmer no a bissle verschdändnislos guggt, aber no hot er Schultra zuckt ond hot denne dr Kofferraum aufgmacht. Des digge Gepäck isch gar ed so oifach en de Kofferraum ganga, aber mit viel guatem Zureda hots dann doch klappt.

Wia se no drenna gsessa send, hot se dr Fahrer verschmitzt aguggt ond gfrogt: "Na, seid ihr zum ersten Mal in Kölle?"

"Jo, send mr", hot der Triabel zugäbba.

"Dat dacht ich mir", hot der Taxischoffeur grenst ond isch losgfahra.

***

Dui Fahrt hot wirklich ed lang daurat, so hand se em ed viel Geld gäbba miassa. Aber wia se vorm Hotel gschdanda send, hand se saubled aus dr Wäsch guggat.

"Des isch ausra Unterkunft?", hot der Sell ogleibig gfrogt.

"Do schdods doch- Hotel Paradies", hot der Triabel ganwordad.

Des hot von draussa ziemlich kehl ausgseah. Saumäßig bunt, ond komische Figura send an der Fassade dra gwea. S isch danna a bissle mulmig gwea, wia se do nei ganga sand.

Denna sand se von oinra hibscha Dame begriaßt worra. Dui war recht grauß, en Kopf greßer als dr Triabel, der wiederum en halbe Kopf greßer war als die boide andere.

"So Jungs, wat kann ich für euch tun?", hot se heflich gfrogt.

Dr Done hot sein Zettel rauskramt ond ihra gäbba. Dui Dama hot en gnomma, aguggt, die drei aguggt, nomol dr Zettel agschdarrad, dann hot se sich zu ihrem Computer dreht ond abbas eitippt.

Noch ra Weile hot se se aglächelt, en Zemmerschlissel rausgholt ond ene gsait, dass se em dridda Schdogg en Zemmer 328 nächdigga werrat.

Die drei hand sich bedankt, send zum Fahrschdual, hand en gruafa, ond als Diar aufganga isch, send drei weitere hübsche ond große Dama ausgschdiga ond hat dia drei Schwoba interessiert aglächelt.

Als sie naufgfahra send, hot dr Triabel dem Done aufd Schuldra glopfft ond en globt, weil er so a subbr Hotel rausgsuacht hot. Do hand die drei ao no ned gwisst, was eane bevor schdod.

(c) 2017 Peter Albra Brenner